貨幣貶值，邊個先係贏家？

前兩日(8月5號)美元兑人民幣中間價破天荒跌穿七算。中國一向都撐住個價，突然間玩貶值，國際社會都跌一跌眼鏡。正值貿易制裁(即係大家慣稱嘅「貿易戰」)，特朗普當然唔會放過呢個機會，即刻將中國列為匯率操縱國啦。

講真我真係唔明，習近平係真傻定假傻呢，定係學國師(陳雲)話齋係「準確地犯錯」。喺呢個非常時候，係應該非常極之小心咁見步行步，偏偏中國就睇啱時機，犯下錯誤。

大佬你玩貨幣貶值，搞到人地美國即刻話你係Currency Manipulator (匯率操縱國)，跟本人地美國係贏到笑。唔係吹水，無偏見，原因有三:

(一) 你將人民幣貶值，無非係想抵消Trump Trump嗰10%關税，一係就想刺激貿易，總之就係要同侵哥鬥氣，但到頭來咪又係自己啲國民食返哂。人民幣貶值，國民消費能力下降，消費意欲隨之下降。當市場嘅需求減少，物價房價隨之下跌，市況慘淡，商家跳樓。簡單嚟講，就係加快中國經濟衰退，或者加速令泡沫爆炸，跟住就唔講啦。加上，中國已經負債累累。貸款已經佔咗中國GDP嘅330%、中國咁多個城市除咗上海之外都出現嚴重財政赤字。喺咁嘅艱難時刻，仲冒死玩貨幣貶值，明眼人應該都知咩事。

(二) 貿易制裁初期，中美兩邊雖然稱唔上叮噹碼頭，但互相都仲有得過吓招。你美國徵我500億貨關税，我又徵你500億貨税;你徵我1000億，我又徵你1000億。但係美中嘅Trade Deficit(貿易逆差)係講緊4190億美元，根本就係天文數字。一開始玩關税嘅時候，大家根本都知道係唔可以攞嚟打持久戰，因為個逆差根本太大，齋玩關税美國直頭係撓埋雙手都贏你。你中國都無可能齋坐喺度畀人打㗎，咁當大家都期待緊你有咩「超必」要出嘅時候，你就咁快出苦肉計，玩貶值。咁即係露哂底，同人講你已經無招可出，叫人地可以盡情出招打你。某程度上亦都畀咗唔少信心美國，可以喺貿易談判用更強硬嘅態度應對中國，對中國絕對係弊大於利！

(三) 中國一出招玩人仔貶值，特朗普就九秒九將中國列做匯率操縱國。咁樣做除咗係為咗更方便制裁中國同提供更多彈藥進行談判之外，其實亦都係為咗兌現佢嘅競選承諾。佢喺當選第一日，就即刻應承國民話要將中國列做Currency Manipulator。你喺啲咁嘅敏感時候玩貶值，人地Trump哥仲唔食住條水兌現政綱咩？最緊要嗰樣，唔好唔記得，選舉近了。時光飛逝，美國2020年又大選啦，人家Trump仲要爭取連任，而家仲唔做吓勢攞吓彩呀？仲有，佢前幾日已經喺Twitter講到明，如果中國想拖到下屆任期先簽協議，到時份協議會比而家嗰份更為茍刻。所以而家根本中國喺到幫Trump Trump助選。

雖然而家中國好頭痕，因為香港美國兩邊都搞到勁大鑊，但我都係要奉勸習主席一句: 謹慎行事，小心為妙。